പ്രഥമ സീസൺ മുതൽ 19 വർഷമായി ഐപിഎല്ലിൽ ബെംഗളൂരു റോയൽ ചലഞ്ചേഴ്സിന്റെ ഭാഗമാണ് സൂപ്പർ താരം വിരാട് കോഹ്ലി. ഒന്നരപതിറ്റാണ്ടിനിപ്പുറം ഫ്രാഞ്ചൈസിയുടെ ചരിത്രത്തിലെ ഏറ്റവും മികച്ച താരങ്ങളിലൊരാളായും താരം മാറി.
ഇപ്പോഴിതാ ആദ്യ സീസണിന് മുന്നോടിയായി കോലിയെ ഡൽഹി ഡയർഡെവിൾസ് (ഇപ്പോൾ ഡൽഹി ക്യാപിറ്റൽസ്) ടീമിലെടുക്കാതിരുന്നത് സംബന്ധിച്ച് പ്രതികരിച്ചിരിക്കുകയാണ് മുൻ ഇന്ത്യൻ താരം വിരേന്ദർ സെവാഗ്. കോഹ്ലിക്ക് പകരം പ്രദീപ് സാംഗ്വാനെയാണ് ഡൽഹി തട്ടകത്തിലെത്തിച്ചതെന്നും അതിന് പിന്നിൽ വ്യക്തമായ കാരണമുണ്ടെന്നും സെവാഗ് പറയുന്നു.
ടീം കോംബിനേഷൻ കാരണമാണ് അന്ന് കോഹ്ലിയെ ഒഴിവാക്കി സാംഗ്വാനെ ടീമിലെടുത്തതെന്നാണ് സെവാഗിന്റെ പക്ഷം. ടീമിൽ ഒട്ടേറെ ബാറ്റർമാരുണ്ടായിരുന്നതായും അതേസമയം ബൗളർമാർ കുറവായിരുന്നുവെന്നും അദ്ദേഹം പറയുന്നു. അതിനാൽ കോഹ്ലിയെപ്പോലെ മറ്റൊരു ബാറ്ററെ ടീമിലേക്ക് പരിഗണിക്കാനായില്ലെന്നും ബൗളറായ സാംഗ്വാനെ ടീമിൽ ഉൾപ്പെടുത്തിയെന്നും സെവാഗ് കൂട്ടിച്ചേർത്തു.
ഡൽഹി ഡെയർഡെവിൾസിൽ 2008-ലെ പ്രഥമ ഐപിഎൽ സീസണിൽ, തിലകരത്നെ ദിൽഷനൊപ്പം ശിഖർ ധവാനും ടീമിലുണ്ടായിരുന്നു. ഇരുവരും ഓപ്പണർമാരായിരുന്നു, പക്ഷെ ഗൗതം ഗംഭീറും ഞാനും ഇന്നിങ്സ് ഓപ്പൺ ചെയ്തിരുന്നതിനാൽ ഞങ്ങൾ അവരെ മൂന്നാം നമ്പറിലും അഞ്ചാം നമ്പറിലും കളിപ്പിച്ചു. മനോജ് തിവാരി നാലാമനായിരുന്നു. അതിനാൽ തന്നെ ടീമിൽ ഒട്ടേറെ ടോപ് ഓർഡർ ബാറ്റർമാരുണ്ടായിരുന്നു. അവരെ എല്ലാവരെയും ബാറ്റിങ് നിരയിൽ ഉൾപ്പെടുത്തുന്നത് ബുദ്ധിമുട്ടായിരുന്നു. - സെവാഗ് ജിയോ ഹോട്ട് സ്റ്റാറിലെ ഒരു പരിപാടിയിൽ പറഞ്ഞു.
പ്രഥമ ഐപിഎൽ സീസണിന് മുന്നോടിയായി നടന്ന ലേലത്തിൽ 12 ലക്ഷം രൂപയ്ക്കാണ് ഡൽഹി സ്വദേശിയായ കോഹ്ലിയെ ആർസിബി റാഞ്ചിയത്. പിന്നീട് ടീമിന്റെ നെടുംതൂണായി താരം മാറി. 272 മത്സരങ്ങളിൽ നിന്നായി 8889 റൺസാണ് കോലിയുടെ സമ്പാദ്യം. എട്ട് സെഞ്ചുറികളും 65 അർധസെഞ്ചുറികളും താരത്തിന്റെ പേരിലുണ്ട്. 2026 സീസണിലും മിന്നും ഫോമിലാണ് താരം. അഞ്ച് മത്സരങ്ങളിൽ നിന്ന് 228 റൺസുമായി കോലി റൺവേട്ടക്കാരിൽ തലപ്പത്താണ്.
Content highlights: virender sehwag reveals why delhi picked sangwan over kohli